Sekkho dhammo nevasekkhanāsekkhassa dhammassa anantarapaccayena paccayo— sekkhaṁ phalaṁ vuṭṭhānassa anantarapaccayena paccayo. Asekkho dhammo asekkhassa dhammassa anantarapaccayena paccayo—purimā purimā asekkhā khandhā pacchimānaṁ pacchimānaṁ asekkhānaṁ khandhānaṁ anantarapaccayena paccayo. Asekkhaṁ phalaṁ asekkhassa phalassa anantarapaccayena paccayo. Asekkho dhammo nevasekkhanāsekkhassa dhammassa anantarapaccayena paccayo— asekkhaṁ phalaṁ vuṭṭhānassa anantarapaccayena paccayo. Nevasekkhanāsekkho dhammo nevasekkhanāsekkhassa dhammassa anantarapaccayena paccayo—purimā purimā nevasekkhanāsekkhā khandhā pacchimānaṁ pacchimānaṁ nevasekkhanāsekkhānaṁ khandhānaṁ …pe… anulomaṁ gotrabhussa … anulomaṁ vodānassa … āvajjanā nevasekkhanāsekkhānaṁ khandhānaṁ anantarapaccayena paccayo. Nevasekkhanāsekkho dhammo sekkhassa dhammassa anantarapaccayena paccayo— gotrabhu maggassa … vodānaṁ maggassa … anulomaṁ sekkhāya phalasamāpattiyā … nirodhā vuṭṭhahantassa nevasaññānāsaññāyatanakusalaṁ sekkhāya phalasamāpattiyā anantarapaccayena paccayo.