Mahaggatārammaṇo dhammo mahaggatārammaṇassa dhammassa ārammaṇapaccayena paccayo—viññāṇañcāyatanaṁ paccavekkhati, nevasaññānāsaññāyatanaṁ paccavekkhati, mahaggatārammaṇaṁ iddhividhañāṇaṁ paccavekkhati, cetopariyañāṇaṁ …pe… pubbenivāsānussatiñāṇaṁ …pe… yathākammūpagañāṇaṁ …pe… anāgataṁsañāṇaṁ paccavekkhati. Mahaggatārammaṇe mahaggate khandhe aniccato …pe… vipassati, assādeti abhinandati, taṁ ārabbha mahaggatārammaṇo rāgo uppajjati …pe… domanassaṁ uppajjati. Cetopariyañāṇena mahaggatārammaṇamahaggatacittasamaṅgissa cittaṁ jānāti. Mahaggatārammaṇā mahaggatā khandhā cetopariyañāṇassa, pubbenivāsānussatiñāṇassa, yathākammūpagañāṇassa, anāgataṁsañāṇassa, āvajjanāya ārammaṇapaccayena paccayo. Mahaggatārammaṇo dhammo parittārammaṇassa dhammassa ārammaṇapaccayena paccayo— paṭhamajjhānapaccavekkhaṇaṁ paccavekkhati …pe… nevasaññānāsaññāyatanapaccavekkhaṇaṁ paccavekkhati, dibbacakkhupaccavekkhaṇaṁ paccavekkhati, dibbasotadhātupaccavekkhaṇaṁ paccavekkhati, iddhividhañāṇapaccavekkhaṇaṁ …pe… cetopariyañāṇapaccavekkhaṇaṁ …pe… pubbenivāsānussatiñāṇapaccavekkhaṇaṁ …pe… yathākammūpagañāṇapaccavekkhaṇaṁ …pe… anāgataṁsañāṇapaccavekkhaṇaṁ paccavekkhati, ariyā mahaggatārammaṇe pahīne kilese paccavekkhanti, vikkhambhite kilese paccavekkhanti, pubbe samudāciṇṇe kilese jānanti. Mahaggatārammaṇe paritte khandhe aniccato …pe… vipassati, assādeti abhinandati, taṁ ārabbha parittārammaṇo rāgo uppajjati …pe… domanassaṁ uppajjati. Cetopariyañāṇena mahaggatārammaṇaparittacittasamaṅgissa cittaṁ jānāti. Mahaggatārammaṇā parittā khandhā cetopariyañāṇassa, pubbenivāsānussatiñāṇassa, yathākammūpagañāṇassa, anāgataṁsañāṇassa, āvajjanāya ārammaṇapaccayena paccayo.