Savitakkasavicāro dhammo avitakkavicāramattassa ca avitakkaavicārassa ca dhammassa anantarapaccayena paccayo—savitakkasavicāraṁ cuticittaṁ avitakkavicāramattassa upapatticittassa vicārassa ca anantarapaccayena paccayo. Savitakkasavicārā khandhā avitakkavicāramattassa vuṭṭhānassa vicārassa ca anantarapaccayena paccayo. Avitakkavicāramattassa jhānassa parikammaṁ avitakkavicāramattassa jhānassa vicārassa ca anantarapaccayena paccayo. Gotrabhu avitakkavicāramattassa maggassa vicārassa ca … vodānaṁ avitakkavicāramattassa maggassa vicārassa ca … anulomaṁ avitakkavicāramattāya phalasamāpattiyā vicārassa ca anantarapaccayena paccayo. Savitakkasavicāro dhammo savitakkasavicārassa ca avitakkavicāramattassa ca dhammassa anantarapaccayena paccayo—purimā purimā savitakkasavicārā khandhā pacchimānaṁ pacchimānaṁ savitakkasavicārānaṁ khandhānaṁ vitakkassa ca anantarapaccayena paccayo. Anulomaṁ gotrabhussa vitakkassa ca … anulomaṁ vodānassa vitakkassa ca … gotrabhu savitakkasavicārassa maggassa vitakkassa ca … vodānaṁ savitakkasavicārassa maggassa vitakkassa ca … savitakkasavicāro maggo savitakkasavicārassa phalassa vitakkassa ca … savitakkasavicāraṁ phalaṁ savitakkasavicārassa phalassa vitakkassa ca … anulomaṁ savitakkasavicārāya phalasamāpattiyā vitakkassa ca anantarapaccayena paccayo. Avitakkavicāramatto dhammo avitakkavicāramattassa dhammassa anantarapaccayena paccayo—purimo purimo vitakko pacchimassa pacchimassa vitakkassa anantarapaccayena paccayo. Purimā purimā avitakkavicāramattā khandhā pacchimānaṁ pacchimānaṁ avitakkavicāramattānaṁ khandhānaṁ anantarapaccayena paccayo. Avitakkavicāramatto maggo avitakkavicāramattassa phalassa … avitakkavicāramattaṁ phalaṁ avitakkavicāramattassa phalassa anantarapaccayena paccayo.