Savitakkasavicāro ca avitakkavicāramatto ca dhammā savitakkasavicārassa ca avitakkavicāramattassa ca dhammassa adhipatipaccayena paccayo. <b>Ārammaṇādhipati</b>—savitakkasavicāre khandhe ca vitakkañca garuṁ katvā savitakkasavicārā khandhā ca vitakko ca uppajjanti. Anantara Savitakkasavicāro dhammo savitakkasavicārassa dhammassa anantarapaccayena paccayo—purimā purimā savitakkasavicārā khandhā pacchimānaṁ pacchimānaṁ savitakkasavicārānaṁ khandhānaṁ anantarapaccayena paccayo. Anulomaṁ gotrabhussa … anulomaṁ vodānassa … gotrabhu savitakkasavicārassa maggassa … vodānaṁ savitakkasavicārassa maggassa … savitakkasavicāro maggo savitakkasavicārassa phalassa … savitakkasavicāraṁ phalaṁ savitakkasavicārassa phalassa … anulomaṁ savitakkasavicārāya phalasamāpattiyā anantarapaccayena paccayo. Savitakkasavicāro dhammo avitakkavicāramattassa dhammassa anantarapaccayena paccayo—purimā purimā savitakkasavicārā khandhā pacchimassa pacchimassa vitakkassa anantarapaccayena paccayo. Savitakkasavicāraṁ cuticittaṁ avitakkavicāramattassa upapatticittassa …pe… savitakkasavicārā khandhā avitakkavicāramattassa vuṭṭhānassa vitakkassa ca …pe… avitakkavicāramattassa jhānassa parikammaṁ avitakkavicāramattassa jhānassa … gotrabhu avitakkavicāramattassa maggassa … vodānaṁ avitakkavicāramattassa maggassa … anulomaṁ avitakkavicāramattāya phalasamāpattiyā vitakkassa ca anantarapaccayena paccayo.