Paritto dhammo parittassa dhammassa āhārapaccayena paccayo …pe… indriyapaccayena paccayo … jhānapaccayena paccayo … maggapaccayena paccayo … sampayuttapaccayena paccayo … vippayuttapaccayena paccayo—sahajātaṁ, purejātaṁ, pacchājātaṁ. <b>Sahajātā</b>—parittā khandhā cittasamuṭṭhānānaṁ rūpānaṁ vippayuttapaccayena paccayo. Paṭisandhikkhaṇe parittā khandhā kaṭattārūpānaṁ vippayuttapaccayena paccayo. Khandhā vatthussa …pe… vatthu khandhānaṁ vippayuttapaccayena paccayo. <b>Purejātaṁ</b>—cakkhāyatanaṁ cakkhuviññāṇassa vippayuttapaccayena paccayo …pe… kāyāyatanaṁ kāyaviññāṇassa vippayuttapaccayena paccayo. Vatthu parittānaṁ khandhānaṁ vippayuttapaccayena paccayo. <b>Pacchājātā</b>—parittā khandhā purejātassa imassa kāyassa vippayuttapaccayena paccayo. Paritto dhammo mahaggatassa dhammassa vippayuttapaccayena paccayo—sahajātaṁ, purejātaṁ. <b>Sahajātaṁ</b>—paṭisandhikkhaṇe vatthu mahaggatānaṁ khandhānaṁ vippayuttapaccayena paccayo. <b>Purejātaṁ</b>—vatthu mahaggatānaṁ khandhānaṁ vippayuttapaccayena paccayo. Paritto dhammo appamāṇassa dhammassa vippayuttapaccayena paccayo. <b>Purejātaṁ</b>—vatthu appamāṇānaṁ khandhānaṁ vippayuttapaccayena paccayo. Mahaggato dhammo parittassa dhammassa vippayuttapaccayena paccayo—sahajātaṁ, pacchājātaṁ. <b>Sahajātā</b>—mahaggatā khandhā cittasamuṭṭhānānaṁ rūpānaṁ vippayuttapaccayena paccayo. Paṭisandhikkhaṇe …pe… <b>pacchājātā</b>—mahaggatā khandhā purejātassa imassa kāyassa vippayuttapaccayena paccayo.