Parittaṁ dhammaṁ paccayā paritto ca mahaggato ca dhammā uppajjanti naadhipatipaccayā—vatthuṁ paccayā vipākā mahaggatā khandhā, mahābhūte paccayā cittasamuṭṭhānaṁ rūpaṁ. Paṭisandhikkhaṇe …pe…. Mahaggataṁ dhammaṁ paccayā mahaggato dhammo uppajjati naadhipatipaccayā— mahaggate khandhe paccayā mahaggatādhipati, vipākaṁ mahaggataṁ ekaṁ khandhaṁ paccayā tayo khandhā …pe… dve khandhe …pe… paṭisandhikkhaṇe …pe…. Mahaggataṁ dhammaṁ paccayā paritto dhammo uppajjati naadhipatipaccayā—vipāke mahaggate khandhe paccayā cittasamuṭṭhānaṁ rūpaṁ. Paṭisandhikkhaṇe …pe…. Mahaggataṁ dhammaṁ paccayā paritto ca mahaggato ca dhammā uppajjanti naadhipatipaccayā—vipākaṁ mahaggataṁ ekaṁ khandhaṁ paccayā tayo khandhā cittasamuṭṭhānañca rūpaṁ …pe… dve khandhe …pe… paṭisandhikkhaṇe …pe…. Appamāṇaṁ dhammaṁ paccayā appamāṇo dhammo uppajjati naadhipatipaccayā— appamāṇe khandhe paccayā appamāṇādhipati. Parittañca appamāṇañca dhammaṁ paccayā appamāṇo dhammo uppajjati naadhipatipaccayā—appamāṇe khandhe ca vatthuñca paccayā appamāṇādhipati. Parittañca mahaggatañca dhammaṁ paccayā paritto dhammo uppajjati naadhipatipaccayā—vipāke mahaggate khandhe ca mahābhūte ca paccayā cittasamuṭṭhānaṁ rūpaṁ. Paṭisandhikkhaṇe …pe….