Pītisahagato dhammo upekkhāsahagatassa dhammassa upanissayapaccayena paccayo— ārammaṇūpanissayo, anantarūpanissayo, pakatūpanissayo …pe…. <b>Pakatūpanissayo</b>—pītisahagataṁ saddhaṁ upanissāya upekkhāsahagatena cittena dānaṁ deti …pe… abhiññaṁ uppādeti, samāpattiṁ uppādeti, mānaṁ jappeti, diṭṭhiṁ gaṇhāti. Pītisahagataṁ sīlaṁ …pe… patthanaṁ upanissāya upekkhāsahagatena cittena dānaṁ deti …pe… nigamaghātaṁ karoti. Pītisahagatā saddhā …pe… patthanā upekkhāsahagatāya saddhāya …pe… patthanāya upanissayapaccayena paccayo. Pītisahagato dhammo pītisahagatassa ca sukhasahagatassa ca dhammassa upanissayapaccayena paccayo—ārammaṇūpanissayo, anantarūpanissayo, pakatūpanissayo …pe…. <b>Pakatūpanissayo</b>—pītisahagataṁ saddhaṁ upanissāya pītisahagatena ca sukhasahagatena ca cittena dānaṁ deti …pe… diṭṭhiṁ gaṇhāti. Pītisahagataṁ sīlaṁ …pe… patthanaṁ upanissāya pītisahagatena ca sukhasahagatena ca cittena dānaṁ deti …pe… nigamaghātaṁ karoti. Pītisahagatā saddhā …pe… patthanā pītisahagatāya ca sukhasahagatāya ca saddhāya …pe… patthanāya upanissayapaccayena paccayo.