Savitakkasavicāro dhammo avitakkavicāramattassa dhammassa adhipatipaccayena paccayo—ārammaṇādhipati, sahajātādhipati. <b>Ārammaṇādhipati</b>—dānaṁ datvā sīlaṁ samādiyitvā uposathakammaṁ katvā taṁ garuṁ katvā paccavekkhati; taṁ garuṁ katvā vitakko uppajjati. Pubbe suciṇṇāni garuṁ katvā paccavekkhati. Savitakkasavicārā jhānā vuṭṭhahitvā, maggā vuṭṭhahitvā, phalā vuṭṭhahitvā phalaṁ garuṁ katvā paccavekkhanti; taṁ garuṁ katvā vitakko uppajjati. Savitakkasavicāre khandhe garuṁ katvā assādeti abhinandati; taṁ garuṁ katvā vitakko uppajjati. <b>Sahajātādhipati</b>—savitakkasavicārā adhipati vitakkassa adhipatipaccayena paccayo. Savitakkasavicāro dhammo avitakkaavicārassa dhammassa adhipatipaccayena paccayo. <b>Sahajātādhipati</b>—savitakkasavicārā adhipati cittasamuṭṭhānānaṁ rūpānaṁ adhipatipaccayena paccayo. Savitakkasavicāro dhammo savitakkasavicārassa ca avitakkaavicārassa ca dhammassa adhipatipaccayena paccayo. <b>Sahajātādhipati</b>—savitakkasavicārā adhipati sampayuttakānaṁ khandhānaṁ cittasamuṭṭhānānañca rūpānaṁ adhipatipaccayena paccayo. Savitakkasavicāro dhammo avitakkavicāramattassa ca avitakkaavicārassa ca dhammassa adhipatipaccayena paccayo. <b>Sahajātādhipati</b>—savitakkasavicārā adhipati vitakkassa ca cittasamuṭṭhānānañca rūpānaṁ adhipatipaccayena paccayo.