Pītisahagato dhammo pītisahagatassa dhammassa adhipatipaccayena paccayo— ārammaṇādhipati, sahajātādhipati. <b>Ārammaṇādhipati</b>—pītisahagatena cittena dānaṁ datvā sīlaṁ samādiyitvā uposathakammaṁ katvā pītisahagatena cittena taṁ garuṁ katvā paccavekkhati, pītisahagatā jhānā vuṭṭhahitvā, maggā vuṭṭhahitvā, phalā vuṭṭhahitvā pītisahagatena cittena taṁ garuṁ katvā paccavekkhati. Pītisahagate khandhe pītisahagatena cittena garuṁ katvā assādeti abhinandati; taṁ garuṁ katvā pītisahagato rāgo uppajjati, diṭṭhi uppajjati. <b>Sahajātādhipati</b>—pītisahagatādhipati sampayuttakānaṁ khandhānaṁ adhipatipaccayena paccayo. Pītisahagato dhammo sukhasahagatassa dhammassa adhipatipaccayena paccayo— ārammaṇādhipati, sahajātādhipati. <b>Ārammaṇādhipati</b>—pītisahagatena cittena dānaṁ datvā …pe…. <b>Sahajātādhipati</b>—pītisahagatādhipati sampayuttakānaṁ sukhasahagatānaṁ khandhānaṁ adhipatipaccayena paccayo. Pītisahagato dhammo upekkhāsahagatassa dhammassa adhipatipaccayena paccayo. <b>Ārammaṇādhipati</b>—pītisahagatena cittena dānaṁ datvā …pe… upekkhāsahagatena cittena. (Saṅkhittaṁ.) Pītisahagato dhammo pītisahagatassa ca sukhasahagatassa ca dhammassa adhipatipaccayena paccayo—ārammaṇādhipati, sahajātādhipati. <b>Ārammaṇādhipati</b>—pītisahagatena cittena dānaṁ datvā …pe…. <b>Sahajātādhipati</b>—pītisahagatādhipati sampayuttakānaṁ pītisahagatānañca sukhasahagatānañca khandhānaṁ adhipatipaccayena paccayo.
