Mahaggato dhammo parittassa dhammassa adhipatipaccayena paccayo— ārammaṇādhipati, sahajātādhipati. <b>Ārammaṇādhipati</b>—paṭhamaṁ jhānaṁ garuṁ katvā …pe… nevasaññānāsaññāyatanaṁ …pe… dibbaṁ cakkhuṁ …pe… anāgataṁsañāṇaṁ garuṁ katvā paccavekkhati. Mahaggate khandhe garuṁ katvā assādeti abhinandati, taṁ garuṁ katvā rāgo uppajjati … diṭṭhi uppajjati. <b>Sahajātādhipati</b>—mahaggatādhipati cittasamuṭṭhānānaṁ rūpānaṁ adhipatipaccayena paccayo. Mahaggato dhammo parittassa ca mahaggatassa ca dhammassa adhipatipaccayena paccayo. <b>Sahajātādhipati</b>—mahaggatādhipati sampayuttakānaṁ khandhānaṁ cittasamuṭṭhānānañca rūpānaṁ adhipatipaccayena paccayo. Appamāṇo dhammo appamāṇassa dhammassa adhipatipaccayena paccayo— ārammaṇādhipati, sahajātādhipati. <b>Ārammaṇādhipati</b>—nibbānaṁ maggassa … phalassa adhipatipaccayena paccayo. <b>Sahajātādhipati</b>—appamāṇādhipati sampayuttakānaṁ khandhānaṁ adhipatipaccayena paccayo. Appamāṇo dhammo parittassa dhammassa adhipatipaccayena paccayo— ārammaṇādhipati, sahajātādhipati. <b>Ārammaṇādhipati</b>—ariyā maggā vuṭṭhahitvā maggaṁ garuṁ katvā paccavekkhanti, phalaṁ garuṁ katvā paccavekkhanti, nibbānaṁ garuṁ katvā paccavekkhanti, nibbānaṁ gotrabhussa, vodānassa adhipatipaccayena paccayo. <b>Sahajātādhipati</b>—appamāṇādhipati cittasamuṭṭhānānaṁ rūpānaṁ adhipatipaccayena paccayo.