Mahaggatārammaṇo dhammo parittārammaṇassa dhammassa adhipatipaccayena paccayo. <b>Ārammaṇādhipati</b>—paṭhamajjhānapaccavekkhaṇaṁ garuṁ katvā paccavekkhati …pe… anāgataṁsañāṇapaccavekkhaṇaṁ garuṁ katvā paccavekkhati. Mahaggatārammaṇe paritte khandhe garuṁ katvā assādeti abhinandati, taṁ garuṁ katvā parittārammaṇo rāgo uppajjati, diṭṭhi uppajjati. Appamāṇārammaṇo dhammo appamāṇārammaṇassa dhammassa adhipatipaccayena paccayo— ārammaṇādhipati, sahajātādhipati. <b>Ārammaṇādhipati</b>—ariyā maggā vuṭṭhahitvā maggaṁ garuṁ katvā paccavekkhanti, phalaṁ garuṁ katvā paccavekkhanti. <b>Sahajātādhipati</b>—appamāṇārammaṇādhipati sampayuttakānaṁ khandhānaṁ adhipatipaccayena paccayo. Appamāṇārammaṇo dhammo parittārammaṇassa dhammassa adhipatipaccayena paccayo. <b>Ārammaṇādhipati</b>—sekkhā gotrabhuṁ garuṁ katvā paccavekkhanti, vodānaṁ garuṁ katvā paccavekkhanti, maggapaccavekkhaṇaṁ garuṁ katvā paccavekkhanti, phalapaccavekkhaṇaṁ garuṁ katvā paccavekkhanti, nibbānapaccavekkhaṇaṁ garuṁ katvā paccavekkhanti. Appamāṇārammaṇo dhammo mahaggatārammaṇassa dhammassa adhipatipaccayena paccayo. <b>Ārammaṇādhipati</b>—sekkhā appamāṇārammaṇaṁ cetopariyañāṇaṁ garuṁ katvā paccavekkhanti. Pubbenivāsānussatiñāṇaṁ …pe… anāgataṁsañāṇaṁ garuṁ katvā paccavekkhanti. Anantara Parittārammaṇo dhammo parittārammaṇassa dhammassa anantarapaccayena paccayo— purimā purimā parittārammaṇā khandhā pacchimānaṁ pacchimānaṁ parittārammaṇānaṁ khandhānaṁ anantarapaccayena paccayo.