(Paṭisandhikkhaṇe pañca pañhā kātabbā. Yattha avitakkavicāramattaṁ āgacchati tattha vipākaṁ kātabbaṁ. Naadhipatimūlake sattatiṁsa pañhā kātabbā.) Naanantarādi Naanantarampi nasamanantarampi naaññamaññampi naupanissayampi satta pañhā rūpaṁyeva. Napurejāte sattatiṁsa paṭiccavārapaccanīyasadisaṁ. Napacchājāte sattatiṁsa, naāsevanepi sadisaṁ. Yattha avitakkavicāramattopi āgacchati, tattha vipākā kātabbā. Nakamma Savitakkasavicāraṁ dhammaṁ paccayā savitakkasavicāro dhammo uppajjati nakammapaccayā—savitakkasavicāre khandhe paccayā savitakkasavicārā cetanā. Avitakkavicāramattaṁ dhammaṁ paccayā avitakkavicāramatto dhammo …pe… avitakkavicāramatte khandhe paccayā avitakkavicāramattā cetanā. Savitakkasavicāro dhammo …pe… vitakkaṁ paccayā savitakkasavicārā cetanā. Avitakkaavicāraṁ dhammaṁ paccayā avitakkaavicāro dhammo …pe… avitakkaavicārā cetanā …pe… (paripuṇṇaṁ kātabbaṁ) savitakkasavicāro …pe… vatthuṁ paccayā savitakkasavicārā cetanā. Avitakkavicāramatto …pe… vicāraṁ paccayā avitakkavicāramattā cetanā. Vatthuṁ paccayā avitakkavicāramattā cetanā. Savitakkasavicārañca avitakkaavicārañca dhammaṁ paccayā savitakkasavicāro dhammo …pe… savitakkasavicāre khandhe ca vatthuñca paccayā savitakkasavicārā cetanā. Avitakkavicāramattañca avitakkaavicārañca dhammaṁ paccayā savitakkasavicāro dhammo …pe… vitakkañca vatthuñca paccayā savitakkasavicārā cetanā.