Dassanena pahātabbahetukaṁ dhammaṁ paccayā dassanena pahātabbahetuko dhammo uppajjati ārammaṇapaccayā … tīṇi. (Paṭiccavāre ārammaṇasadisā.) Bhāvanāya pahātabbahetukaṁ dhammaṁ paccayā … tīṇi. (Paṭiccavārasadisā.) Nevadassanena nabhāvanāya pahātabbahetukaṁ dhammaṁ paccayā nevadassanena nabhāvanāya pahātabbahetuko dhammo uppajjati ārammaṇapaccayā—nevadassanena nabhāvanāya pahātabbahetukaṁ ekaṁ khandhaṁ paccayā tayo khandhā …pe… dve khandhā. Paṭisandhikkhaṇe …pe… vatthuṁ paccayā khandhā. Cakkhāyatanaṁ paccayā cakkhuviññāṇaṁ …pe… kāyāyatanaṁ paccayā kāyaviññāṇaṁ; vatthuṁ paccayā nevadassanena nabhāvanāya pahātabbahetukā khandhā. Nevadassanena nabhāvanāya pahātabbahetukaṁ dhammaṁ paccayā dassanena pahātabbahetuko dhammo uppajjati ārammaṇapaccayā—vatthuṁ paccayā dassanena pahātabbahetukā khandhā; vicikicchāsahagataṁ mohaṁ paccayā sampayuttakā khandhā. Nevadassanena nabhāvanāya pahātabbahetukaṁ dhammaṁ paccayā bhāvanāya pahātabbahetuko dhammo uppajjati ārammaṇapaccayā—vatthuṁ paccayā bhāvanāya pahātabbahetukā khandhā; uddhaccasahagataṁ mohaṁ paccayā sampayuttakā khandhā. Nevadassanena nabhāvanāya pahātabbahetukaṁ dhammaṁ paccayā dassanena pahātabbahetuko ca nevadassanena nabhāvanāya pahātabbahetuko ca dhammā uppajjanti ārammaṇapaccayā—vatthuṁ paccayā vicikicchāsahagatā khandhā ca moho ca.