Parittārammaṇo dhammo parittārammaṇassa dhammassa adhipatipaccayena paccayo— ārammaṇādhipati, sahajātādhipati. <b>Ārammaṇādhipati</b>—dānaṁ datvā sīlaṁ samādiyitvā uposathakammaṁ katvā taṁ garuṁ katvā paccavekkhati, pubbe suciṇṇāni garuṁ katvā paccavekkhati, parittārammaṇe paritte khandhe garuṁ katvā assādeti abhinandati, taṁ garuṁ katvā parittārammaṇo rāgo uppajjati, diṭṭhi uppajjati. <b>Sahajātādhipati</b>—parittārammaṇādhipati sampayuttakānaṁ khandhānaṁ adhipatipaccayena paccayo. Parittārammaṇo dhammo mahaggatārammaṇassa dhammassa adhipatipaccayena paccayo. <b>Ārammaṇādhipati</b>—dibbaṁ cakkhuṁ garuṁ katvā paccavekkhati, dibbaṁ sotadhātuṁ …pe… parittārammaṇaṁ iddhividhañāṇaṁ …pe… cetopariyañāṇaṁ …pe… pubbenivāsānussatiñāṇaṁ …pe… yathākammūpagañāṇaṁ …pe… anāgataṁsañāṇaṁ garuṁ katvā paccavekkhati. Parittārammaṇe mahaggate khandhe garuṁ katvā assādeti abhinandati, taṁ garuṁ katvā mahaggatārammaṇo rāgo uppajjati, diṭṭhi uppajjati. Mahaggatārammaṇo dhammo mahaggatārammaṇassa dhammassa adhipatipaccayena paccayo—ārammaṇādhipati, sahajātādhipati. <b>Ārammaṇādhipati</b>—viññāṇañcāyatanaṁ garuṁ katvā paccavekkhati, nevasaññānāsaññāyatanaṁ …pe… mahaggatārammaṇaṁ iddhividhañāṇaṁ …pe… cetopariyañāṇaṁ …pe… pubbenivāsānussatiñāṇaṁ …pe… yathākammūpagañāṇaṁ …pe… anāgataṁsañāṇaṁ garuṁ katvā paccavekkhati. Mahaggatārammaṇe mahaggate khandhe garuṁ katvā assādeti abhinandati, taṁ garuṁ katvā mahaggatārammaṇo rāgo uppajjati, diṭṭhi uppajjati. <b>Sahajātādhipati</b>—mahaggatārammaṇādhipati sampayuttakānaṁ khandhānaṁ adhipatipaccayena paccayo.