Maggārammaṇo dhammo maggārammaṇassa dhammassa hetupaccayena paccayo— maggārammaṇā hetū sampayuttakānaṁ khandhānaṁ hetupaccayena paccayo. Maggārammaṇo dhammo maggādhipatissa dhammassa hetupaccayena paccayo— maggārammaṇā hetū sampayuttakānaṁ maggādhipatīnaṁ khandhānaṁ hetupaccayena paccayo. Maggārammaṇo dhammo maggārammaṇassa ca maggādhipatissa ca dhammassa hetupaccayena paccayo. (Iminā kāraṇena sattarasa pañhā kātabbā.) Ārammaṇa Maggahetuko dhammo maggārammaṇassa dhammassa ārammaṇapaccayena paccayo—ariyā maggā vuṭṭhahitvā maggaṁ paccavekkhanti, cetopariyañāṇena maggahetukacittasamaṅgissa cittaṁ jānanti, maggahetukā khandhā cetopariyañāṇassa, pubbenivāsānussatiñāṇassa, anāgataṁsañāṇassa, āvajjanāya ārammaṇapaccayena paccayo. Maggahetuko dhammo maggādhipatissa dhammassa ārammaṇapaccayena paccayo—ariyā maggā vuṭṭhahitvā maggaṁ garuṁ katvā paccavekkhanti.