Aniyato dhammo micchattaniyatassa dhammassa ārammaṇapaccayena paccayo— rūpajīvitindriyaṁ mātughātikammassa … pitughātikammassa … arahantaghātikammassa … ruhiruppādakammassa ārammaṇapaccayena paccayo. Yaṁ vatthuṁ parāmasantassa micchattaniyatā khandhā uppajjanti, taṁ vatthu micchattaniyatānaṁ khandhānaṁ ārammaṇapaccayena paccayo. Aniyato dhammo sammattaniyatassa dhammassa ārammaṇapaccayena paccayo—nibbānaṁ maggassa ārammaṇapaccayena paccayo. Adhipati Micchattaniyato dhammo micchattaniyatassa dhammassa adhipatipaccayena paccayo. <b>Sahajātādhipati</b>—micchattaniyatādhipati sampayuttakānaṁ khandhānaṁ adhipatipaccayena paccayo. Micchattaniyato dhammo aniyatassa dhammassa adhipatipaccayena paccayo. <b>Sahajātādhipati</b>—micchattaniyatādhipati cittasamuṭṭhānānaṁ rūpānaṁ adhipatipaccayena paccayo. Micchattaniyato dhammo micchattaniyatassa ca aniyatassa ca dhammassa adhipatipaccayena paccayo. <b>Sahajātādhipati</b>—micchattaniyatādhipati sampayuttakānaṁ khandhānaṁ cittasamuṭṭhānānañca rūpānaṁ adhipatipaccayena paccayo. Sammattaniyato dhammo sammattaniyatassa dhammassa adhipatipaccayena paccayo. <b>Sahajātādhipati</b>—sammattaniyatādhipati sampayuttakānaṁ khandhānaṁ adhipatipaccayena paccayo.