Nevadassanena nabhāvanāya pahātabbahetuko dhammo dassanena pahātabbahetukassa dhammassa purejātapaccayena paccayo—ārammaṇapurejātaṁ, vatthupurejātaṁ. <b>Ārammaṇapurejātaṁ</b>—cakkhuṁ …pe… vatthuṁ assādeti abhinandati; taṁ ārabbha dassanena pahātabbahetuko rāgo …pe… diṭṭhi …pe… vicikicchā …pe… dassanena pahātabbahetukaṁ domanassaṁ uppajjati. <b>Vatthupurejātaṁ</b>—vatthu dassanena pahātabbahetukānaṁ khandhānaṁ purejātapaccayena paccayo. Nevadassanena nabhāvanāya pahātabbahetuko dhammo bhāvanāya pahātabbahetukassa dhammassa purejātapaccayena paccayo—ārammaṇapurejātaṁ, vatthupurejātaṁ. <b>Ārammaṇapurejātaṁ</b>—cakkhuṁ …pe… vatthuṁ assādeti abhinandati; taṁ ārabbha bhāvanāya pahātabbahetuko rāgo uppajjati, uddhaccaṁ uppajjati, bhāvanāya pahātabbahetukaṁ domanassaṁ uppajjati. <b>Vatthupurejātaṁ</b>—vatthu bhāvanāya pahātabbahetukānaṁ khandhānaṁ purejātapaccayena paccayo. Nevadassanena nabhāvanāya pahātabbahetuko dhammo dassanena pahātabbahetukassa ca nevadassanena nabhāvanāya pahātabbahetukassa ca dhammassa purejātapaccayena paccayo—ārammaṇapurejātaṁ, vatthupurejātaṁ. <b>Ārammaṇapurejātaṁ</b>—cakkhuṁ …pe… vatthuṁ ārabbha vicikicchāsahagatā khandhā ca moho ca uppajjanti. <b>Vatthupurejātaṁ</b>—vatthu vicikicchāsahagatānaṁ khandhānaṁ mohassa ca purejātapaccayena paccayo.