Avitakkavicāramattaṁ dhammaṁ paṭicca avitakkavicāramatto dhammo uppajjati hetupaccayā—avitakkavicāramattaṁ ekaṁ khandhaṁ paṭicca tayo khandhā …pe… dve khandhe paṭicca dve khandhā. Paṭisandhikkhaṇe avitakkavicāramattaṁ ekaṁ khandhaṁ paṭicca tayo khandhā …pe… dve khandhe paṭicca dve khandhā. Avitakkavicāramattaṁ dhammaṁ paṭicca savitakkasavicāro dhammo uppajjati hetupaccayā—vitakkaṁ paṭicca savitakkasavicārā khandhā. Paṭisandhikkhaṇe vitakkaṁ paṭicca savitakkasavicārā khandhā. Avitakkavicāramattaṁ dhammaṁ paṭicca avitakkaavicāro dhammo uppajjati hetupaccayā—avitakkavicāramatte khandhe paṭicca vicāro cittasamuṭṭhānañca rūpaṁ; vitakkaṁ paṭicca cittasamuṭṭhānaṁ rūpaṁ. Paṭisandhikkhaṇe avitakkavicāramatte khandhe paṭicca vicāro kaṭattā ca rūpaṁ. Paṭisandhikkhaṇe vitakkaṁ paṭicca kaṭattārūpaṁ. Avitakkavicāramattaṁ dhammaṁ paṭicca savitakkasavicāro ca avitakkaavicāro ca dhammā uppajjanti hetupaccayā—vitakkaṁ paṭicca savitakkasavicārā khandhā cittasamuṭṭhānañca rūpaṁ. Paṭisandhikkhaṇe vitakkaṁ paṭicca savitakkasavicārā khandhā kaṭattā ca rūpaṁ.