Avitakkavicāramatto dhammo avitakkavicāramattassa ca avitakkaavicārassa ca dhammassa anantarapaccayena paccayo—purimā purimā avitakkavicāramattā khandhā pacchimānaṁ pacchimānaṁ avitakkavicāramattānaṁ khandhānaṁ vicārassa ca anantarapaccayena paccayo. Avitakkavicāramatto maggo avitakkavicāramattassa phalassa vicārassa ca … avitakkavicāramattaṁ phalaṁ avitakkavicāramattassa phalassa vicārassa ca anantarapaccayena paccayo. Avitakkavicāramatto dhammo savitakkasavicārassa ca avitakkavicāramattassa ca dhammassa anantarapaccayena paccayo—purimo purimo vitakko pacchimānaṁ pacchimānaṁ savitakkasavicārānaṁ khandhānaṁ vitakkassa ca anantarapaccayena paccayo. Avitakkavicāramattaṁ cuticittaṁ savitakkasavicārassa upapatticittassa vitakkassa ca anantarapaccayena paccayo. Avitakkavicāramattaṁ bhavaṅgaṁ āvajjanāya vitakkassa ca anantarapaccayena paccayo. Avitakkavicāramattā khandhā savitakkasavicārassa vuṭṭhānassa vitakkassa ca anantarapaccayena paccayo. Avitakkaavicāro dhammo avitakkaavicārassa dhammassa anantarapaccayena paccayo— purimo purimo vicāro pacchimassa pacchimassa vicārassa anantarapaccayena paccayo. Purimā purimā avitakkaavicārā khandhā pacchimānaṁ pacchimānaṁ avitakkaavicārānaṁ khandhānaṁ anantarapaccayena paccayo. Avitakkaavicāro maggo avitakkaavicārassa phalassa … avitakkaavicāraṁ phalaṁ avitakkaavicārassa phalassa anantarapaccayena paccayo. Nirodhā vuṭṭhahantassa nevasaññānāsaññāyatanaṁ avitakkaavicārāya phalasamāpattiyā vicārassa ca anantarapaccayena paccayo.