Parittārammaṇo dhammo mahaggatārammaṇassa dhammassa anantarapaccayena paccayo— parittārammaṇaṁ cuticittaṁ mahaggatārammaṇassa upapatticittassa anantarapaccayena paccayo. Parittārammaṇaṁ bhavaṅgaṁ mahaggatārammaṇāya āvajjanāya anantarapaccayena paccayo. Parittārammaṇā khandhā mahaggatārammaṇassa vuṭṭhānassa anantarapaccayena paccayo. Parittārammaṇo dhammo appamāṇārammaṇassa dhammassa anantarapaccayena paccayo— parittārammaṇaṁ bhavaṅgaṁ appamāṇārammaṇāya āvajjanāya anantarapaccayena paccayo. Parittārammaṇaṁ anulomaṁ gotrabhussa … anulomaṁ vodānassa … anulomaṁ phalasamāpattiyā anantarapaccayena paccayo. Mahaggatārammaṇo dhammo mahaggatārammaṇassa dhammassa anantarapaccayena paccayo—purimā purimā mahaggatārammaṇā khandhā pacchimānaṁ pacchimānaṁ mahaggatārammaṇānaṁ khandhānaṁ anantarapaccayena paccayo. Mahaggatārammaṇo dhammo parittārammaṇassa dhammassa anantarapaccayena paccayo— mahaggatārammaṇaṁ cuticittaṁ parittārammaṇassa upapatticittassa anantarapaccayena paccayo. Mahaggatārammaṇaṁ bhavaṅgaṁ parittārammaṇāya āvajjanāya anantarapaccayena paccayo. Mahaggatārammaṇā khandhā parittārammaṇassa vuṭṭhānassa anantarapaccayena paccayo.