Nevasekkhanāsekkho dhammo nevasekkhanāsekkhassa dhammassa ārammaṇapaccayena paccayo—dānaṁ datvā sīlaṁ samādiyitvā uposathakammaṁ katvā taṁ paccavekkhati, pubbe suciṇṇāni …pe… jhānā vuṭṭhahitvā jhānaṁ paccavekkhati, ariyā nibbānaṁ paccavekkhanti. Nibbānaṁ gotrabhussa, vodānassa, āvajjanāya ārammaṇapaccayena paccayo. Ariyā pahīne kilese paccavekkhanti vikkhambhite kilese paccavekkhanti, pubbe samudāciṇṇe kilese jānanti, cakkhuṁ aniccato dukkhato anattato vipassanti, assādenti abhinandanti, taṁ ārabbha rāgo uppajjati …pe… domanassaṁ uppajjati, sotaṁ …pe… vatthuṁ nevasekkhanāsekkhe khandhe aniccato dukkhato anattato vipassanti, assādenti …pe… domanassaṁ uppajjati, dibbena cakkhunā rūpaṁ passati, dibbāya sotadhātuyā saddaṁ suṇāti, cetopariyañāṇena nevasekkhanāsekkhacittasamaṅgissa cittaṁ jānāti, ākāsānañcāyatanaṁ viññāṇañcāyatanassa …pe… ākiñcaññāyatanaṁ nevasaññānāsaññāyatanassa ārammaṇapaccayena paccayo. Rūpāyatanaṁ cakkhuviññāṇassa …pe… phoṭṭhabbāyatanaṁ kāyaviññāṇassa …pe… nevasekkhanāsekkhā khandhā iddhividhañāṇassa, cetopariyañāṇassa, pubbenivāsānussatiñāṇassa, yathākammūpagañāṇassa, anāgataṁsañāṇassa, āvajjanāya ārammaṇapaccayena paccayo. Nevasekkhanāsekkho dhammo sekkhassa dhammassa ārammaṇapaccayena paccayo— nibbānaṁ maggassa, sekkhassa phalassa ārammaṇapaccayena paccayo. Nevasekkhanāsekkho dhammo asekkhassa dhammassa ārammaṇapaccayena paccayo— nibbānaṁ asekkhassa phalassa ārammaṇapaccayena paccayo. Adhipati Sekkho dhammo sekkhassa dhammassa adhipatipaccayena paccayo. <b>Sahajātādhipati</b>—sekkhādhipati sampayuttakānaṁ khandhānaṁ adhipatipaccayena paccayo. Sekkho dhammo nevasekkhanāsekkhassa dhammassa adhipatipaccayena paccayo— ārammaṇādhipati, sahajātādhipati. <b>Ārammaṇādhipati</b>—ariyā maggā vuṭṭhahitvā maggaṁ garuṁ katvā paccavekkhanti, sekkhaṁ phalaṁ garuṁ katvā paccavekkhanti. <b>Sahajātādhipati</b>—sekkhādhipati cittasamuṭṭhānānaṁ rūpānaṁ adhipatipaccayena paccayo.