Savitakkasavicāro ca avitakkaavicāro ca dhammā savitakkasavicārassa ca avitakkavicāramattassa ca dhammassa sahajātapaccayena paccayo— paṭisandhikkhaṇe savitakkasavicāro eko khandho ca vatthu ca tiṇṇannaṁ khandhānaṁ vitakkassa ca …pe… dve khandhā ca vatthu ca dvinnaṁ khandhānaṁ vitakkassa ca sahajātapaccayena paccayo. Avitakkavicāramatto ca avitakkaavicāro ca dhammā savitakkasavicārassa dhammassa sahajātapaccayena paccayo—paṭisandhikkhaṇe vitakko ca vatthu ca savitakkasavicārānaṁ khandhānaṁ sahajātapaccayena paccayo. Avitakkavicāramatto ca avitakkaavicāro ca dhammā avitakkavicāramattassa dhammassa sahajātapaccayena paccayo—avitakkavicāramatto eko khandho ca vicāro ca tiṇṇannaṁ khandhānaṁ …pe… dve khandhā ca vicāro ca dvinnaṁ khandhānaṁ sahajātapaccayena paccayo. Paṭisandhikkhaṇe avitakkavicāramatto eko khandho ca vicāro ca tiṇṇannaṁ khandhānaṁ …pe… dve khandhā ca vicāro ca dvinnaṁ khandhānaṁ …pe… paṭisandhikkhaṇe avitakkavicāramatto eko khandho ca vatthu ca tiṇṇannaṁ khandhānaṁ sahajātapaccayena paccayo.