Hetupaccayā naārammaṇe pañca, naadhipatiyā dasa, naanantare pañca, nasamanantare naaññamaññe naupanissaye pañca, napurejāte dvādasa, napacchājāte terasa, naāsevane terasa, nakamme tīṇi, navipāke nava, nasampayutte pañca, navippayutte tīṇi, nonatthiyā pañca, novigate pañca. (Evaṁ gaṇetabbaṁ.) Anulomapaccanīyaṁ. 1.13.1.4. Paccayapaccanīyānuloma Nahetupaccayā ārammaṇe ekaṁ, anantare ekaṁ …pe… vigate ekaṁ, avigate ekaṁ. (Evaṁ gaṇetabbaṁ.) Paccanīyānulomaṁ. Paṭiccavāro. 1.13.2. Sahajātavāra Sahajātavāropi paṭiccavārasadiso. 1.13.3. Paccayavāra 1.13.3.1. Paccayānuloma Vibhaṅgavāra Hetu Parittaṁ dhammaṁ paccayā paritto dhammo uppajjati hetupaccayā—parittaṁ ekaṁ khandhaṁ paccayā tayo khandhā cittasamuṭṭhānañca rūpaṁ …pe… dve khandhe …pe… paṭisandhikkhaṇe …pe… khandhe paccayā vatthu, vatthuṁ paccayā khandhā; ekaṁ mahābhūtaṁ paccayā …pe… upādārūpaṁ, vatthuṁ paccayā parittā khandhā. Parittaṁ dhammaṁ paccayā mahaggato dhammo uppajjati hetupaccayā—vatthuṁ paccayā mahaggatā khandhā. Paṭisandhikkhaṇe vatthuṁ paccayā mahaggatā khandhā. Parittaṁ dhammaṁ paccayā appamāṇo dhammo uppajjati hetupaccayā—vatthuṁ paccayā appamāṇā khandhā.