Avitakkaavicāro dhammo avitakkavicāramattassa dhammassa adhipatipaccayena paccayo. <b>Ārammaṇādhipati</b>—ariyā avitakkaavicārā jhānā vuṭṭhahitvā, maggā vuṭṭhahitvā, phalā vuṭṭhahitvā phalaṁ garuṁ katvā paccavekkhanti; taṁ garuṁ katvā vitakko uppajjati, ariyā nibbānaṁ garuṁ katvā paccavekkhanti; nibbānaṁ avitakkavicāramattassa maggassa phalassa vitakkassa ca adhipatipaccayena paccayo. Cakkhuṁ …pe… vatthuṁ … avitakkaavicāre khandhe ca vicārañca garuṁ katvā assādeti abhinandati; taṁ garuṁ katvā vitakko uppajjati. Avitakkaavicāro dhammo avitakkavicāramattassa ca avitakkaavicārassa ca dhammassa adhipatipaccayena paccayo. <b>Ārammaṇādhipati</b>—nibbānaṁ avitakkavicāramattassa maggassa phalassa vicārassa ca adhipatipaccayena paccayo. Avitakkaavicāro dhammo savitakkasavicārassa ca avitakkavicāramattassa ca dhammassa adhipatipaccayena paccayo. <b>Ārammaṇādhipati</b>—ariyā avitakkaavicārā jhānā vuṭṭhahitvā, maggā vuṭṭhahitvā, phalā vuṭṭhahitvā phalaṁ garuṁ katvā paccavekkhanti; taṁ garuṁ katvā savitakkasavicārā khandhā ca vitakko ca uppajjanti, ariyā nibbānaṁ garuṁ katvā paccavekkhanti; nibbānaṁ gotrabhussa vitakkassa ca vodānassa vitakkassa ca savitakkasavicārassa maggassa vitakkassa ca savitakkasavicārassa phalassa vitakkassa ca adhipatipaccayena paccayo. Cakkhuṁ garuṁ katvā …pe… vatthuṁ … avitakkaavicāre khandhe ca vicārañca garuṁ katvā assādeti abhinandati; taṁ garuṁ katvā savitakkasavicārā khandhā ca vitakko ca uppajjanti.