Upekkhāsahagato dhammo upekkhāsahagatassa dhammassa āsevanapaccayena paccayo— purimā purimā upekkhāsahagatā khandhā pacchimānaṁ pacchimānaṁ upekkhāsahagatānaṁ khandhānaṁ …pe… upekkhāsahagataṁ vodānaṁ upekkhāsahagatassa maggassa āsevanapaccayena paccayo. Pītisahagato ca sukhasahagato ca dhammā pītisahagatassa dhammassa …pe… sukhasahagatassa dhammassa …pe… pītisahagatassa ca sukhasahagatassa ca dhammassa āsevanapaccayena paccayo—purimā purimā pītisahagatā ca sukhasahagatā ca khandhā pacchimānaṁ pacchimānaṁ pītisahagatānañca sukhasahagatānañca khandhānaṁ āsevanapaccayena paccayo …pe… pītisahagatañca sukhasahagatañca vodānaṁ pītisahagatassa ca sukhasahagatassa ca maggassa āsevanapaccayena paccayo. Kamma Pītisahagato dhammo pītisahagatassa dhammassa kammapaccayena paccayo— sahajātā, nānākkhaṇikā. <b>Sahajātā</b>—pītisahagatā cetanā sampayuttakānaṁ khandhānaṁ kammapaccayena paccayo. Paṭisandhikkhaṇe pītisahagatā cetanā sampayuttakānaṁ khandhānaṁ kammapaccayena paccayo. <b>Nānākkhaṇikā</b>—pītisahagatā cetanā vipākānaṁ pītisahagatānaṁ khandhānaṁ kammapaccayena paccayo.