Pītisahagato dhammo pītisahagatassa dhammassa āsevanapaccayena paccayo—purimā purimā pītisahagatā khandhā pacchimānaṁ pacchimānaṁ pītisahagatānaṁ khandhānaṁ āsevanapaccayena paccayo. Pītisahagataṁ anulomaṁ pītisahagatassa gotrabhussa … anulomaṁ vodānassa … gotrabhu maggassa … vodānaṁ maggassa āsevanapaccayena paccayo. Pītisahagato dhammo sukhasahagatassa dhammassa āsevanapaccayena paccayo— purimā purimā pītisahagatā khandhā pacchimānaṁ pacchimānaṁ sukhasahagatānaṁ khandhānaṁ āsevanapaccayena paccayo. Pītisahagataṁ anulomaṁ sukhasahagatassa gotrabhussa āsevanapaccayena paccayo. Pītisahagataṁ anulomaṁ sukhasahagatassa vodānassa āsevanapaccayena paccayo. Pītisahagataṁ gotrabhu sukhasahagatassa maggassa … pītisahagataṁ vodānaṁ sukhasahagatassa maggassa āsevanapaccayena paccayo. Pītisahagato dhammo pītisahagatassa ca sukhasahagatassa ca dhammassa āsevanapaccayena paccayo—purimā purimā pītisahagatā khandhā pacchimānaṁ pacchimānaṁ pītisahagatānañca sukhasahagatānañca khandhānaṁ āsevanapaccayena paccayo …pe… pītisahagataṁ vodānaṁ pītisahagatassa ca sukhasahagatassa ca maggassa āsevanapaccayena paccayo. Sukhasahagato dhammo sukhasahagatassa dhammassa …pe… pītisahagatassa dhammassa …pe… pītisahagatassa ca sukhasahagatassa ca dhammassa āsevanapaccayena paccayo. (Saṅkhittaṁ. Pītinayaṁ passitvā kātabbaṁ.)