Nahetuyā cha, naadhipatiyā ekādasa, napurejāte ekādasa, napacchājāte ekādasa, naāsevane ekādasa, nakamme satta, navipāke ekādasa, najhāne ekaṁ, namagge cha, navippayutte ekādasa. Paccanīyaṁ. 1.7.5.3. Paccayānulomapaccanīya Duka Hetupaccayā naadhipatiyā ekādasa …pe… navippayutte ekādasa. (Saṅkhittaṁ.) Anulomapaccanīyaṁ. 1.7.5.4. Paccayapaccanīyānuloma Nahetupaccayā ārammaṇe cha …pe… purejāte cha, āsevane pañca, kamme cha …pe… jhāne cha, magge tīṇi, sampayutte cha …pe… avigate cha. Paccanīyānulomaṁ. 1.7.6. Sampayuttavāra Sampayuttavāropi vitthāretabbo. 1.7.7. Pañhāvāra 1.7.7.1. Paccayānuloma Vibhaṅgavāra Hetu Savitakkasavicāro dhammo savitakkasavicārassa dhammassa hetupaccayena paccayo— savitakkasavicārā hetū sampayuttakānaṁ khandhānaṁ hetupaccayena paccayo. Paṭisandhikkhaṇe …pe…. Savitakkasavicāro dhammo avitakkavicāramattassa dhammassa hetupaccayena paccayo—savitakkasavicārā hetū vitakkassa hetupaccayena paccayo. Paṭisandhikkhaṇe …pe…. Savitakkasavicāro dhammo avitakkaavicārassa dhammassa hetupaccayena paccayo— savitakkasavicārā hetū cittasamuṭṭhānānaṁ rūpānaṁ hetupaccayena paccayo. Paṭisandhikkhaṇe savitakkasavicārā hetū kaṭattārūpānaṁ hetupaccayena paccayo.