Maggādhipatiṁ dhammaṁ paṭicca maggādhipati dhammo uppajjati naadhipatipaccayā— maggādhipatī khandhe paṭicca maggādhipati adhipati. Maggādhipatiṁ ekaṁ khandhaṁ paṭicca tayo khandhā …pe… dve khandhe …pe…. Maggādhipatiṁ dhammaṁ paṭicca maggārammaṇo dhammo uppajjati naadhipatipaccayā— maggādhipatiṁ ekaṁ khandhaṁ paṭicca maggārammaṇā tayo khandhā …pe… dve khandhe …pe…. Maggādhipatiṁ dhammaṁ paṭicca maggahetuko dhammo uppajjati naadhipatipaccayā— maggādhipatī khandhe paṭicca maggahetuko adhipati. Maggādhipatiṁ dhammaṁ paṭicca maggārammaṇo ca maggādhipati ca dhammā uppajjanti naadhipatipaccayā—maggādhipatiṁ ekaṁ khandhaṁ paṭicca maggārammaṇā ca maggādhipatī ca tayo khandhā …pe… dve khandhe …pe…. Maggādhipatiṁ dhammaṁ paṭicca maggahetuko ca maggādhipati ca dhammā uppajjanti naadhipatipaccayā—maggādhipatī khandhe paṭicca maggahetuko ca maggādhipati ca adhipati. Maggārammaṇañca maggādhipatiñca dhammaṁ paṭicca maggārammaṇo dhammo uppajjati naadhipatipaccayā—maggārammaṇañca maggādhipatiñca ekaṁ khandhaṁ paṭicca maggārammaṇā tayo khandhā …pe… dve khandhe …pe…. Maggārammaṇañca maggādhipatiñca dhammaṁ paṭicca maggādhipati dhammo uppajjati naadhipatipaccayā—maggārammaṇañca maggādhipatiñca ekaṁ khandhaṁ paṭicca maggādhipatī tayo khandhā …pe… dve khandhe …pe….