Hetuṁ micchattaniyataṁ dhammaṁ paṭicca hetu micchattaniyato dhammo uppajjati ārammaṇapaccayā. (Saṅkhittaṁ.) Hetuyā nava, ārammaṇe nava, adhipatiyā nava, anantare nava, samanantare nava, sahajāte nava, aññamaññe nava, nissaye nava, upanissaye nava, purejāte nava, āsevane nava, kamme nava, āhāre nava …pe… avigate nava. (Saṅkhittaṁ.) Naadhipati Hetuṁ micchattaniyataṁ dhammaṁ paṭicca nahetu micchattaniyato dhammo uppajjati naadhipatipaccayā. (Saṅkhittaṁ.) Naadhipatiyā tīṇi, napacchājāte nava, nakamme tīṇi, navipāke nava. (Saṅkhittaṁ.) Hetupaccayā naadhipatiyā tīṇi. (Saṅkhittaṁ.) Naadhipatipaccayā hetuyā tīṇi. (Saṅkhittaṁ.) (Sahajātavāropi paccayavāropi nissayavāropi saṁsaṭṭhavāropi sampayuttavāropi paṭiccavārasadisā vitthāretabbā.) Hetu-adhipati Hetu micchattaniyato dhammo hetussa micchattaniyatassa dhammassa hetupaccayena paccayo … tīṇi. Nahetu micchattaniyato dhammo nahetussa micchattaniyatassa dhammassa adhipatipaccayena paccayo—sahajātādhipati … tīṇi. (Saṅkhittaṁ.)