Hetuyā dve, ārammaṇe dve …pe… avigate dve. (Saṅkhittaṁ. Dassanena pahātabbadukaakusalasadisaṁ. Sahajātavārepi …pe… pañhāvārepi sabbattha vitthāretabbaṁ.) Nabhāvanāya pahātabbaṁ abyākataṁ dhammaṁ paṭicca nabhāvanāya pahātabbo abyākato dhammo uppajjati hetupaccayā. (Saṅkhittaṁ.) Hetuyā ekaṁ, ārammaṇe ekaṁ …pe… avigate ekaṁ. (Saṅkhittaṁ.) (Sahajātavārepi …pe… pañhāvārepi sabbattha ekaṁ.) 3.13.3. Dassanenapahātabbahetukaduka, Kusalattika 3.13.3.1–7. Paṭiccādivāra Paccayacatukka Nadassanena pahātabbahetukaṁ kusalaṁ dhammaṁ paṭicca nadassanena pahātabbahetuko kusalo dhammo uppajjati hetupaccayā. (Saṅkhittaṁ.) Hetuyā ekaṁ, ārammaṇe ekaṁ …pe… avigate ekaṁ. (Saṅkhittaṁ.) (Sahajātavārepi …pe… pañhāvārepi sabbattha ekaṁ.) Dassanena pahātabbahetukaṁ akusalaṁ dhammaṁ paṭicca dassanena pahātabbahetuko akusalo dhammo uppajjati hetupaccayā. Nadassanena pahātabbahetukaṁ akusalaṁ dhammaṁ paṭicca nadassanena pahātabbahetuko akusalo dhammo uppajjati hetupaccayā. Nadassanena pahātabbahetukaṁ akusalaṁ dhammaṁ paṭicca dassanena pahātabbahetuko akusalo dhammo uppajjati hetupaccayā. Dassanena pahātabbahetukaṁ akusalañca nadassanena pahātabbahetukaṁ akusalañca dhammaṁ paṭicca dassanena pahātabbahetuko akusalo dhammo uppajjati hetupaccayā.