Maggārammaṇo nahetu ca maggādhipati nahetu ca dhammā maggārammaṇassa nahetussa dhammassa upanissayapaccayena paccayo … tīṇi. Maggahetuko nahetu ca maggādhipati nahetu ca dhammā maggahetukassa nahetussa dhammassa upanissayapaccayena paccayo … pañca. (Saṅkhittaṁ.) Ārammaṇe nava, adhipatiyā ekavīsa, anantare nava, samanantare nava, sahajāte sattarasa, aññamaññe sattarasa, nissaye sattarasa, upanissaye ekavīsa, āsevane nava, kamme sattarasa, āhāre indriye jhāne magge sampayutte sattarasa …pe… avigate sattarasa. (Saṅkhittaṁ.) Nahetuyā ekavīsa, naārammaṇe sattarasa. (Saṅkhittaṁ.) Ārammaṇapaccayā nahetuyā nava. (Saṅkhittaṁ.) Nahetupaccayā ārammaṇe nava. (Saṅkhittaṁ.) (Yathā kusalattike pañhāvāraṁ, evaṁ vitthāretabbaṁ.) 4.1.17. Uppannattika, Hetuduka Hetvādi Uppanno hetu dhammo uppannassa hetussa dhammassa hetupaccayena paccayo— uppannā hetū sampayuttakānaṁ hetūnaṁ hetupaccayena paccayo; paṭisandhikkhaṇe …pe…. Anuppanno hetu dhammo uppannassa hetussa dhammassa ārammaṇapaccayena paccayo— anuppannā hetū cetopariyañāṇassa anāgataṁsañāṇassa ārammaṇapaccayena paccayo. Uppādī hetu dhammo uppannassa hetussa dhammassa ārammaṇapaccayena paccayo— uppādī hetū cetopariyañāṇassa anāgataṁsañāṇassa ārammaṇapaccayena paccayo.