Kusalaṁ savitakkasavicāraṁ dhammaṁ paṭicca kusalo savitakkasavicāro dhammo uppajjati hetupaccayā. Akusalaṁ savitakkasavicāraṁ dhammaṁ paṭicca akusalo savitakkasavicāro dhammo uppajjati hetupaccayā. Abyākataṁ savitakkasavicāraṁ dhammaṁ paṭicca abyākato savitakkasavicāro dhammo uppajjati hetupaccayā. (Saṅkhittaṁ.) Hetuyā tīṇi, ārammaṇe tīṇi …pe… vipāke ekaṁ …pe… avigate tīṇi. (Saṅkhittaṁ.) (Sahajātavārampi …pe… sampayuttavārampi paṭiccavārasadisaṁ.) Kusalo savitakkasavicāro dhammo kusalassa savitakkasavicārassa dhammassa hetupaccayena paccayo. Akusalo savitakkasavicāro dhammo akusalassa savitakkasavicārassa dhammassa hetupaccayena paccayo. Abyākato savitakkasavicāro dhammo abyākatassa savitakkasavicārassa dhammassa hetupaccayena paccayo. (Saṅkhittaṁ.) Hetuyā tīṇi, ārammaṇe nava, adhipatiyā …pe… samanantare satta, sahajāte aññamaññe nissaye tīṇi, upanissaye nava, āsevane tīṇi, kamme pañca, vipāke ekaṁ, āhāre …pe… sampayutte tīṇi …pe… avigate tīṇi. (Saṅkhittaṁ.) (Yathā kusalattike pañhāvāraṁ evaṁ vitthāretabbaṁ.) Kusalaṁ avitakkavicāramattaṁ dhammaṁ paṭicca kusalo avitakkavicāramatto dhammo uppajjati hetupaccayā. Abyākataṁ avitakkavicāramattaṁ dhammaṁ paṭicca abyākato avitakkavicāramatto dhammo uppajjati hetupaccayā. (Saṅkhittaṁ.)