Hetuṁ akusalaṁ dhammaṁ paṭicca nahetu akusalo dhammo uppajjati nakammapaccayā. Nahetuṁ akusalaṁ dhammaṁ paṭicca nahetu akusalo dhammo uppajjati nakammapaccayā. Hetuṁ akusalañca nahetuṁ akusalañca dhammaṁ paṭicca nahetu akusalo dhammo uppajjati nakammapaccayā. (Saṅkhittaṁ.) Nahetuyā ekaṁ, naadhipatiyā nava, napurejāte nava, napacchājāte nava, naāsevane nava, nakamme tīṇi, navipāke nava, navippayutte nava. (Paccanīyaṁ.) Hetupaccayā naadhipatiyā nava. (Saṅkhittaṁ, anulomapaccanīyaṁ.) Nahetupaccayā ārammaṇe ekaṁ. (Saṅkhittaṁ, paccanīyānulomaṁ.) (Sahajātavārampi paccayavārampi nissayavārampi saṁsaṭṭhavārampi sampayuttavārampi paṭiccavārasadisā vitthāretabbā.) 3.1.1.2.7. Pañhāvāra Paccayacatukka Hetu Hetu akusalo dhammo hetussa akusalassa dhammassa hetupaccayena paccayo. Hetu akusalo dhammo nahetussa akusalassa dhammassa hetupaccayena paccayo. Hetu akusalo dhammo hetussa akusalassa ca nahetussa akusalassa ca dhammassa hetupaccayena paccayo. Ārammaṇādi Hetu akusalo dhammo hetussa akusalassa dhammassa ārammaṇapaccayena paccayo … tīṇi.