Sahetukaṁ kusalaṁ dhammaṁ paṭicca sahetuko kusalo dhammo uppajjati ārammaṇapaccayā. (Saṅkhittaṁ.) Hetuyā ekaṁ, ārammaṇe ekaṁ, adhipatiyā ekaṁ, anantare ekaṁ, samanantare ekaṁ, sahajāte ekaṁ, aññamaññe ekaṁ, nissaye ekaṁ, upanissaye ekaṁ, purejāte ekaṁ, āsevane ekaṁ, kamme ekaṁ, āhāre ekaṁ …pe… avigate ekaṁ. (Saṅkhittaṁ.) Naadhipati Sahetukaṁ kusalaṁ dhammaṁ paṭicca sahetuko kusalo dhammo uppajjati naadhipatipaccayā. (Saṅkhittaṁ.) Naadhipatiyā ekaṁ, napurejāte ekaṁ, napacchājāte ekaṁ, naāsevane ekaṁ, nakamme ekaṁ, navipāke ekaṁ, navippayutte ekaṁ. (Saṅkhittaṁ.) Hetupaccayā naadhipatiyā ekaṁ. (Saṅkhittaṁ.) Naadhipatipaccayā hetuyā ekaṁ. (Saṅkhittaṁ.) (Sahajātavāropi paccayavāropi nissayavāropi saṁsaṭṭhavāropi sampayuttavāropi paṭiccavārasadisā vitthāretabbā.) 3.2.2.1.7. Pañhāvāra Paccayacatukka Hetu-ārammaṇa Sahetuko kusalo dhammo sahetukassa kusalassa dhammassa hetupaccayena paccayo. Sahetuko kusalo dhammo sahetukassa kusalassa dhammassa ārammaṇapaccayena paccayo. (Saṅkhittaṁ.)