Hetuyā nava, ārammaṇe cattāri, adhipatiyā pañca, anantare cattāri, samanantare cattāri, sahajāte nava, aññamaññe cha …pe… purejāte dve, āsevane dve, kamme nava, vipāke nava …pe… vippayutte nava …pe… avigate nava. (Saṅkhittaṁ.) Nahetu-naārammaṇa Ahetukaṁ abyākataṁ dhammaṁ paṭicca ahetuko abyākato dhammo uppajjati nahetupaccayā. Sahetukaṁ abyākataṁ dhammaṁ paṭicca ahetuko abyākato dhammo uppajjati naārammaṇapaccayā. Ahetukaṁ abyākataṁ dhammaṁ paṭicca ahetuko abyākato dhammo uppajjati naārammaṇapaccayā. Sahetukaṁ abyākatañca ahetukaṁ abyākatañca dhammaṁ paṭicca ahetuko abyākato dhammo uppajjati naārammaṇapaccayā. Sahetukaṁ abyākataṁ dhammaṁ paṭicca sahetuko abyākato dhammo uppajjati naadhipatipaccayā. (Saṅkhittaṁ.) Nahetuyā ekaṁ, naārammaṇe tīṇi, naadhipatiyā nava, naanantare tīṇi, nasamanantare tīṇi, naaññamaññe tīṇi, naupanissaye tīṇi, napurejāte nava, napacchājāte nava, naāsevane nava, nakamme dve, navipāke pañca, naāhāre ekaṁ, naindriye ekaṁ, najhāne ekaṁ, namagge ekaṁ, nasampayutte tīṇi, navippayutte dve, nonatthiyā tīṇi, novigate tīṇi. (Saṅkhittaṁ.) Hetupaccayā naārammaṇe tīṇi. (Saṅkhittaṁ.) Nahetupaccayā ārammaṇe ekaṁ. (Saṅkhittaṁ.)