Cittaṁ kusalañca nocittaṁ kusalañca dhammaṁ paṭicca nocitto kusalo dhammo uppajjati hetupaccayā. (Saṅkhittaṁ.) Hetuyā pañca, ārammaṇe pañca (sabbattha pañca), avigate pañca. (Saṅkhittaṁ.) Naadhipatiyā pañca, napurejāte pañca, napacchājāte pañca, naāsevane pañca, nakamme tīṇi, navipāke pañca, navippayutte pañca. (Saṅkhittaṁ.) (Sahajātavārampi …pe… sampayuttavārampi vitthāretabbaṁ.) Nocitto kusalo dhammo nocittassa kusalassa dhammassa hetupaccayena paccayo. Nocitto kusalo dhammo cittassa kusalassa dhammassa hetupaccayena paccayo. Nocitto kusalo dhammo cittassa kusalassa ca nocittassa kusalassa ca dhammassa hetupaccayena paccayo. (Saṅkhittaṁ.) Hetuyā tīṇi, ārammaṇe nava, adhipatiyā nava, anantare nava …pe… sahajāte aññamaññe nissaye pañca, upanissaye āsevane nava, kamme tīṇi, āhāre indriye pañca, jhāne magge tīṇi, sampayutte pañca …pe… avigate pañca. (Saṅkhittaṁ.) Nahetuyā nava, naārammaṇe nava. (Saṅkhittaṁ.) Hetupaccayā naārammaṇe tīṇi. (Saṅkhittaṁ.) Nahetupaccayā ārammaṇe nava. (Saṅkhittaṁ.) (Yathā kusalattike pañhāvārassa anulomampi paccanīyampi anulomapaccanīyampi paccanīyānulomampi gaṇitaṁ, evaṁ gaṇetabbaṁ.)