Hetuyā tīṇi, ārammaṇe pañca, adhipatiyā pañca, anantare cha, samanantare cha, sahajāte tīṇi, aññamaññe tīṇi, nissaye tīṇi, upanissaye aṭṭha, āsevane tīṇi, vipāke indriye magge dve, sampayutte tīṇi …pe… avigate tīṇi. (Saṅkhittaṁ.) Nahetuyā aṭṭha, naārammaṇe aṭṭha. (Saṅkhittaṁ.) Hetupaccayā naārammaṇe tīṇi. (Saṅkhittaṁ.) Nahetupaccayā ārammaṇe pañca. (Saṅkhittaṁ.) (Yathā kusalattike pañhāvāraṁ, evaṁ vitthāretabbaṁ.) Hetu Hīnaṁ nahetuṁ dhammaṁ paṭicca hīno nahetu dhammo uppajjati hetupaccayā. (Yathā saṅkiliṭṭhattikahetudukaṁ, evaṁ vitthāretabbaṁ.) 4.1.15. Micchattaniyatattika, Hetuduka Hetu Micchattaniyataṁ hetuṁ dhammaṁ paṭicca micchattaniyato hetu dhammo uppajjati hetupaccayā. Sammattaniyataṁ hetuṁ dhammaṁ paṭicca sammattaniyato hetu dhammo uppajjati hetupaccayā. Aniyataṁ hetuṁ dhammaṁ paṭicca aniyato hetu dhammo uppajjati hetupaccayā. (Saṅkhittaṁ.) Hetuyā tīṇi, ārammaṇe tīṇi, adhipatiyā tīṇi …pe… vipāke ekaṁ …pe… avigate tīṇi. (Saṅkhittaṁ.) Naadhipatiyā dve, napurejāte dve, napacchājāte tīṇi, naāsevane ekaṁ, navipāke tīṇi, navippayutte dve. (Saṅkhittaṁ.)