Hetuṁ atītārammaṇaṁ dhammaṁ paṭicca hetu atītārammaṇo dhammo uppajjati hetupaccayā … tīṇi. Nahetuṁ atītārammaṇaṁ dhammaṁ paṭicca nahetu atītārammaṇo dhammo uppajjati hetupaccayā … tīṇi. Hetuṁ atītārammaṇañca nahetuṁ atītārammaṇañca dhammaṁ paṭicca hetu atītārammaṇo dhammo uppajjati hetupaccayā … tīṇi. (Saṅkhittaṁ.) Hetuyā nava, ārammaṇe nava, adhipatiyā nava, anantare nava, samanantare nava …pe… kamme nava …pe… avigate nava. (Saṅkhittaṁ.) Nahetu-naadhipati Nahetuṁ atītārammaṇaṁ dhammaṁ paṭicca nahetu atītārammaṇo dhammo uppajjati nahetupaccayā. Nahetuṁ atītārammaṇaṁ dhammaṁ paṭicca hetu atītārammaṇo dhammo uppajjati nahetupaccayā. Hetuṁ atītārammaṇaṁ dhammaṁ paṭicca hetu atītārammaṇo dhammo uppajjati naadhipatipaccayā. (Saṅkhittaṁ.) Nahetuyā dve, naadhipatiyā nava, napurejāte nava, napacchājāte nava, naāsevane nava, nakamme tīṇi, navipāke nava, namagge ekaṁ, navippayutte nava. (Saṅkhittaṁ.) Hetupaccayā naadhipatiyā nava. (Saṅkhittaṁ.) Nahetupaccayā ārammaṇe dve. (Saṅkhittaṁ.)