Naadhipatiyā ekaṁ, napurejāte ekaṁ …pe… navipāke ekaṁ, navippayutte ekaṁ. (Pañhāvārepi sabbattha ekaṁ.) Hetu Nahetuṁ sahetukaṁ akusalaṁ dhammaṁ paṭicca nahetu sahetuko akusalo dhammo uppajjati hetupaccayā. (Saṅkhittaṁ.) Hetuyā ekaṁ, ārammaṇe ekaṁ (sabbattha ekaṁ), avigate ekaṁ. (Hetupaccayo natthi. Pañhāvārepi sabbattha ekaṁ, pañhāvārepi imesaṁ tiṇṇannaṁ hetupaccayo natthi.) 3.2.6.3. Abyākatapada 3.2.6.3.1–6 Paṭiccādivāra Paccayacatukka Hetu Nahetuṁ sahetukaṁ abyākataṁ dhammaṁ paṭicca nahetu sahetuko abyākato dhammo uppajjati hetupaccayā. Nahetuṁ sahetukaṁ abyākataṁ dhammaṁ paṭicca nahetu ahetuko abyākato dhammo uppajjati hetupaccayā. Nahetuṁ sahetukaṁ abyākataṁ dhammaṁ paṭicca nahetu sahetuko abyākato ca nahetu ahetuko abyākato ca dhammā uppajjanti hetupaccayā. Nahetuṁ ahetukaṁ abyākataṁ dhammaṁ paṭicca nahetu ahetuko abyākato dhammo uppajjati hetupaccayā … tīṇi.