Pītisahagato hetu ca sukhasahagato hetu ca dhammā pītisahagatassa hetussa dhammassa ārammaṇapaccayena paccayo … cattāri. Pītisahagato hetu dhammo pītisahagatassa hetussa dhammassa adhipatipaccayena paccayo. Hetuyā dasa, ārammaṇe soḷasa, adhipatiyā soḷasa, anantare soḷasa, samanantare soḷasa, sahajāte dasa, aññamaññe dasa, nissaye dasa, upanissaye soḷasa …pe… vipāke dasa …pe… avigate dasa. (Saṅkhittaṁ.) Nahetuyā soḷasa, naārammaṇe soḷasa. (Saṅkhittaṁ.) Hetupaccayā naārammaṇe dasa. (Saṅkhittaṁ.) Nahetupaccayā ārammaṇe soḷasa. (Saṅkhittaṁ.) (Yathā kusalattike pañhāvāraṁ, evaṁ vitthāretabbaṁ.) Hetu-ārammaṇa Pītisahagataṁ nahetuṁ dhammaṁ paṭicca pītisahagato nahetu dhammo uppajjati hetupaccayā. Pītisahagataṁ nahetuṁ dhammaṁ paṭicca sukhasahagato nahetu dhammo uppajjati hetupaccayā. Pītisahagataṁ nahetuṁ dhammaṁ paṭicca pītisahagato nahetu ca sukhasahagato nahetu ca dhammā uppajjanti hetupaccayā. Sukhasahagataṁ nahetuṁ dhammaṁ paṭicca sukhasahagato nahetu dhammo uppajjati hetupaccayā. Sukhasahagataṁ nahetuṁ dhammaṁ paṭicca pītisahagato nahetu dhammo uppajjati hetupaccayā. Sukhasahagataṁ nahetuṁ dhammaṁ paṭicca pītisahagato nahetu ca sukhasahagato nahetu ca dhammā uppajjanti hetupaccayā.