Abyākato pītisahagato dhammo abyākatassa pītisahagatassa dhammassa hetupaccayena paccayo. (Saṅkhittaṁ.) Hetuyā tīṇi, ārammaṇe nava, adhipatiyā satta, anantare pañca …pe… sahajāte aññamaññe nissaye tīṇi, upanissaye nava, āsevane tīṇi, kamme pañca, vipāke ekaṁ, āhāre …pe… sampayutte tīṇi …pe… avigate tīṇi. (Saṅkhittaṁ.) (Yathā kusalattike pañhāvāraṁ evaṁ vitthāretabbaṁ.) Kusalaṁ sukhasahagataṁ dhammaṁ paṭicca kusalo sukhasahagato dhammo uppajjati hetupaccayā. Akusalaṁ sukhasahagataṁ dhammaṁ paṭicca akusalo sukhasahagato dhammo uppajjati hetupaccayā. Abyākataṁ sukhasahagataṁ dhammaṁ paṭicca abyākato sukhasahagato dhammo uppajjati hetupaccayā. (Saṅkhittaṁ.) Hetuyā tīṇi, ārammaṇe tīṇi …pe… vipāke ekaṁ …pe… avigate tīṇi. (Saṅkhittaṁ.) (Sahajātavārampi …pe… pañhāvārampi vitthāretabbaṁ.) Kusalaṁ upekkhāsahagataṁ dhammaṁ paṭicca kusalo upekkhāsahagato dhammo uppajjati hetupaccayā. Akusalaṁ upekkhāsahagataṁ dhammaṁ paṭicca akusalo upekkhāsahagato dhammo uppajjati hetupaccayā. Abyākataṁ upekkhāsahagataṁ dhammaṁ paṭicca abyākato upekkhāsahagato dhammo uppajjati hetupaccayā. (Saṅkhittaṁ.) Hetuyā tīṇi …pe… vipāke ekaṁ …pe… avigate tīṇi. (Saṅkhittaṁ.) (Sahajātavārampi …pe… pañhāvārampi vitthāretabbaṁ.) 5.1.7. Kusalattika, Dassanattika Paccayacatukka