Yathā kusalattike pañhāvāraṁ, evaṁ vitthāretabbaṁ. 4.2.6.2. Nahetuahetukapada Hetu Abyākataṁ nahetuṁ ahetukaṁ dhammaṁ paṭicca abyākato nahetu ahetuko dhammo uppajjati hetupaccayā. (Saṅkhittaṁ.) Hetuyā ekaṁ, ārammaṇe ekaṁ …pe… avigate ekaṁ. (Saṅkhittaṁ.) Nahetuyā ekaṁ …pe… novigate ekaṁ. (Saṅkhittaṁ.) (Sahajātavārampi …pe… sampayuttavārampi paṭiccavārasadisaṁ.) Abyākato nahetu ahetuko dhammo abyākatassa nahetussa ahetukassa dhammassa ārammaṇapaccayena paccayo. (Saṅkhittaṁ.) Ārammaṇe ekaṁ, adhipatiyā ekaṁ …pe… avigate ekaṁ. (Saṅkhittaṁ.) (Yathā kusalattike pañhāvāraṁ, evaṁ vitthāretabbaṁ.) Hetugocchakaṁ niṭṭhitaṁ. 4.3. Kusalattika, Cūḷantaraduka 4.3.1. Kusalattika-Sappaccayaduka Kusalaṁ sappaccayaṁ dhammaṁ paṭicca kusalo sappaccayo dhammo uppajjati hetupaccayā. Kusalaṁ sappaccayaṁ dhammaṁ paṭicca abyākato sappaccayo dhammo uppajjati hetupaccayā. Kusalaṁ sappaccayaṁ dhammaṁ paṭicca kusalo sappaccayo ca abyākato sappaccayo ca dhammā uppajjanti hetupaccayā. Akusalaṁ sappaccayaṁ dhammaṁ paṭicca akusalo sappaccayo dhammo uppajjati hetupaccayā … tīṇi.