Sukhāya vedanāya sampayuttaṁ araṇaṁ dhammaṁ paṭicca sukhāya vedanāya sampayutto araṇo dhammo uppajjati hetupaccayā. Adukkhamasukhāya vedanāya sampayuttaṁ araṇaṁ dhammaṁ paṭicca adukkhamasukhāya vedanāya sampayutto araṇo dhammo uppajjati hetupaccayā. (Saṅkhittaṁ.) Hetuyā dve, ārammaṇe tīṇi, adhipatiyā dve …pe… āsevane dve …pe… jhāne magge dve …pe… avigate tīṇi. (Saṅkhittaṁ.) (Sahajātavārampi …pe… sampayuttavārampi paṭiccavārasadisaṁ.) Sukhāya vedanāya sampayutto araṇo dhammo sukhāya vedanāya sampayuttassa araṇassa dhammassa hetupaccayena paccayo. Adukkhamasukhāya vedanāya sampayutto araṇo dhammo adukkhamasukhāya vedanāya sampayuttassa araṇassa dhammassa hetupaccayena paccayo. (Saṅkhittaṁ.) Hetuyā dve, ārammaṇe cha, adhipatiyā cattāri, anantare samanantare satta, sahajāte aññamaññe nissaye tīṇi, upanissaye nava, āsevane dve, kamme pañca, vipāke āhāre indriye tīṇi, jhāne magge dve, sampayutte tīṇi …pe… avigate tīṇi. (Saṅkhittaṁ.) (Yathā kusalattike pañhāvāraṁ, evaṁ vitthāretabbaṁ.) 4.8.3. Vipākattika, Saraṇaduka Vipākadhammadhammaṁ saraṇaṁ dhammaṁ paṭicca vipākadhammadhammo saraṇo dhammo uppajjati hetupaccayā. (Saṅkhittaṁ.) Hetuyā ekaṁ …pe… avigate ekaṁ. (Saṅkhittaṁ.) (Sahajātavārepi …pe… pañhāvārepi sabbattha ekaṁ.)