Akusalo sahetuko ceva na ca hetu dhammo akusalassa sahetukassa ceva na ca hetussa dhammassa ārammaṇapaccayena paccayo … tīṇi. Abyākato sahetuko ceva na ca hetu dhammo abyākatassa sahetukassa ceva na ca hetussa dhammassa ārammaṇapaccayena paccayo … tīṇi. (Saṅkhittaṁ.) Ārammaṇe nava, adhipatiyā satta, anantare pañca …pe… sahajāte tīṇi …pe… upanissaye nava, āsevane tīṇi, kamme pañca, vipāke ekaṁ, āhāre …pe… sampayutte tīṇi …pe… avigate tīṇi. (Saṅkhittaṁ.) Nahetuyā nava, naārammaṇe nava. (Saṅkhittaṁ.) Ārammaṇapaccayā nahetuyā nava. (Saṅkhittaṁ.) Nahetupaccayā ārammaṇe nava. (Saṅkhittaṁ.) Yathā kusalattike pañhāvāraṁ, evaṁ vitthāretabbaṁ. 4.2.5. Kusalattika, Hetuhetusampayuttaduka Hetu Kusalaṁ hetuñceva hetusampayuttañca dhammaṁ paṭicca kusalo hetu ceva hetusampayutto ca dhammo uppajjati hetupaccayā. Akusalaṁ hetuñceva hetusampayuttañca dhammaṁ paṭicca akusalo hetu ceva hetusampayutto ca dhammo uppajjati hetupaccayā. Abyākataṁ hetuñceva hetusampayuttañca dhammaṁ paṭicca abyākato hetu ceva hetusampayutto ca dhammo uppajjati hetupaccayā. (Saṅkhittaṁ.) Hetuyā tīṇi …pe… vipāke ekaṁ …pe… avigate tīṇi. (Saṅkhittaṁ.) Naadhipatiyā tīṇi …pe… navippayutte tīṇi. (Saṅkhittaṁ.)