Kusalaṁ ajjhattārammaṇaṁ dhammaṁ paṭicca nakusalo naajjhattārammaṇo dhammo uppajjati hetupaccayā. (Saṅkhittaṁ.) Hetuyā nava, adhipatiyā nava …pe… aññamaññe tīṇi …pe… vipāke tīṇi …pe… avigate nava. Kusalaṁ bahiddhārammaṇaṁ dhammaṁ paṭicca nakusalo nabahiddhārammaṇo dhammo uppajjati hetupaccayā. (Saṅkhittaṁ.) Hetuyā nava, adhipatiyā nava …pe… aññamaññe tīṇi …pe… vipāke tīṇi …pe… avigate nava. 17.20. Kusalattika, Sanidassanattika Abyākato sanidassanasappaṭigho dhammo naabyākatassa nasanidassanasappaṭighassa dhammassa ārammaṇapaccayena paccayo. (Tīṇi veditakaṁ kātabbaṁ.) Ārammaṇe cha, adhipatiyā tīṇi, upanissaye purejāte atthiyā avigate cha. Abyākataṁ anidassanasappaṭighaṁ dhammaṁ paṭicca kusalo naanidassanasappaṭigho dhammo uppajjati hetupaccayā. Abyākataṁ anidassanasappaṭighaṁ dhammaṁ paṭicca naakusalo naanidassanasappaṭigho dhammo uppajjati hetupaccayā. Abyākataṁ anidassanasappaṭighaṁ dhammaṁ paṭicca nakusalo naanidassanasappaṭigho ca naakusalo naanidassanasappaṭigho ca dhammā uppajjanti hetupaccayā. (Saṅkhittaṁ.) Hetuyā tīṇi, adhipatiyā tīṇi …pe… avigate tīṇi.