19.1. Kusalattika Namo tassa Bhagavato Arahato Sammāsambuddhassa. 19.1.1–2. Paṭiccādivāra Hetu-ārammaṇa Nakusalaṁ dhammaṁ paṭicca akusalo dhammo uppajjati hetupaccayā. Akusalaṁ ekaṁ khandhaṁ paṭicca tayo khandhā …pe… dve khandhe paṭicca dve khandhā nakusalaṁ dhammaṁ paṭicca abyākato dhammo uppajjati hetupaccayā. Vipākābyākataṁ kiriyābyākataṁ ekaṁ khandhaṁ paṭicca tayo khandhā cittasamuṭṭhānañca rūpaṁ …pe… nakusalaṁ dhammaṁ paṭicca akusalo ca abyākato ca dhammā uppajjanti hetupaccayā … tīṇi. Naakusalaṁ dhammaṁ paṭicca kusalo dhammo uppajjati hetupaccayā. Naakusalaṁ dhammaṁ paṭicca abyākato dhammo uppajjati hetupaccayā. Naakusalaṁ dhammaṁ paṭicca kusalo ca abyākato ca dhammā uppajjanti hetupaccayā … tīṇi.