Nabhāvanāya pahātabbaṁ nahetuṁ dhammaṁ paṭicca nabhāvanāya pahātabbo nanahetu dhammo uppajjati hetupaccayā … ekaṁ. (Saṅkhittaṁ.) Hetuyā dve …pe… vipāke ekaṁ …pe… avigate dve. Dassanena pahātabbahetukaṁ hetuṁ dhammaṁ paṭicca nadassanena pahātabbahetuko nahetu dhammo uppajjati hetupaccayā … tīṇi. Nadassanena pahātabbahetukaṁ hetuṁ dhammaṁ paṭicca nanadassanena pahātabbahetuko nahetu dhammo uppajjati hetupaccayā … tīṇi. (Sabbattha pañhe. Saṅkhittaṁ.) Hetuyā cha, ārammaṇe dve, adhipatiyā ekaṁ …pe… vipāke ekaṁ …pe… avigate cha. Dassanena pahātabbahetukaṁ nahetuṁ dhammaṁ paṭicca nanadassanena pahātabbahetuko nanahetu dhammo uppajjati hetupaccayā. Nadassanena pahātabbahetukaṁ nahetuṁ dhammaṁ paṭicca nadassanena pahātabbahetuko nanahetu dhammo uppajjati hetupaccayā. (Saṅkhittaṁ.) Hetuyā dve, ārammaṇe tīṇi, adhipatiyā dve …pe… vipāke ekaṁ …pe… avigate tīṇi. 18.25. Saraṇaduka, Hetudukādi Saraṇaṁ hetuṁ dhammaṁ paṭicca nasaraṇo nahetu dhammo uppajjati hetupaccayā … tīṇi.