Savitakkasavicārañca avitakkavicāramattañca dhammaṁ paṭicca nasavitakkasavicāro dhammo uppajjati hetupaccayā …pe… satta. Savitakkasavicārañca avitakkavicāramattañca avitakkaavicārañca dhammaṁ paṭicca nasavitakkasavicāro dhammo uppajjati hetupaccayā …pe… satta. (Saṅkhittaṁ.) Hetuyā ekūnapaññāsa, ārammaṇe ekūnapaññāsa, adhipatiyā bāttiṁsa …pe… purejāte āsevane pañcavīsa …pe… avigate ekūnapaññāsa. (Sahajātavārampi …pe… pañhāvārampi vitthāretabbaṁ.) 13.7. Pītittika Hetu Pītisahagataṁ dhammaṁ paṭicca napītisahagato dhammo uppajjati hetupaccayā. Pītisahagataṁ dhammaṁ paṭicca nasukhasahagato dhammo uppajjati hetupaccayā. Pītisahagataṁ dhammaṁ paṭicca naupekkhāsahagato dhammo uppajjati hetupaccayā. Pītisahagataṁ dhammaṁ paṭicca napītisahagato ca naupekkhāsahagato ca dhammā uppajjanti hetupaccayā. Pītisahagataṁ dhammaṁ paṭicca nasukhasahagato ca naupekkhāsahagato ca dhammā uppajjanti hetupaccayā. Pītisahagataṁ dhammaṁ paṭicca napītisahagato ca nasukhasahagato ca dhammā uppajjanti hetupaccayā. Pītisahagataṁ dhammaṁ paṭicca napītisahagato ca nasukhasahagato ca naupekkhāsahagato ca dhammā uppajjanti hetupaccayā. Sukhasahagataṁ dhammaṁ paṭicca nasukhasahagato dhammo uppajjati hetupaccayā …pe… satta.