Nakenaci viññeyyaṁ nasanidassanasappaṭighaṁ dhammaṁ paṭicca kenaci viññeyyo sanidassanasappaṭigho dhammo uppajjati hetupaccayā. Nakenaci viññeyyaṁ nasanidassanasappaṭighaṁ dhammaṁ paṭicca kenaci naviññeyyo sanidassanasappaṭigho dhammo uppajjati hetupaccayā. Nakenaci viññeyyaṁ nasanidassanasappaṭighaṁ dhammaṁ paṭicca kenaci viññeyyo sanidassanasappaṭigho ca kenaci naviññeyyo sanidassanasappaṭigho ca dhammā uppajjanti hetupaccayā. Nakenaci naviññeyyaṁ nasanidassanasappaṭighaṁ dhammaṁ paṭicca … tīṇiyeva. Nakenaci viññeyyaṁ nasanidassanasappaṭighañca nakenaci naviññeyyaṁ nasanidassanasappaṭighañca dhammaṁ paṭicca … tīṇiyeva. (Sabbattha nava.) Nakenaci viññeyyaṁ naanidassanasappaṭighassa purimasadisaṁ navapañhaṁ kātabbaṁ. Nakenaci viññeyyaṁ naanidassanaappaṭighamūlassa nava pañhāyeva. Hetuyā nava, adhipatiyā nava …pe… avigate nava. 21.46. Āsavaduka, Sanidassanattika Naāsavaṁ nasanidassanasappaṭighaṁ dhammaṁ paṭicca noāsavo sanidassanasappaṭigho dhammo uppajjati hetupaccayā … ekaṁ. Nanoāsavaṁ nasanidassanasappaṭighaṁ dhammaṁ paṭicca noāsavo sanidassanasappaṭigho dhammo uppajjati hetupaccayā … ekaṁ. (Saṅkhittaṁ.) Hetuyā tīṇi, adhipatiyā tīṇi …pe… vipāke ekaṁ …pe… avigate tīṇi. Noāsavaṁ naanidassanasappaṭighaṁ dhammaṁ paṭicca …. (Purimanayena tīṇi pañhā.) Hetuyā tīṇi, adhipatiyā tīṇi …pe… aññamaññe ekaṁ …pe… vipāke ekaṁ …pe… avigate tīṇi.