Nanaupekkhāsahagataṁ dhammaṁ paṭicca naupekkhāsahagato dhammo uppajjati hetupaccayā … tīṇi. Naupekkhāsahagatañca nanaupekkhāsahagatañca dhammaṁ paṭicca upekkhāsahagato dhammo uppajjati hetupaccayā. Naupekkhāsahagatañca nanaupekkhāsahagatañca dhammaṁ paṭicca naupekkhāsahagato dhammo uppajjati hetupaccayā. Naupekkhāsahagatañca nanaupekkhāsahagatañca dhammaṁ paṭicca upekkhāsahagato ca naupekkhāsahagato ca dhammā uppajjanti hetupaccayā … tīṇi. (Saṅkhittaṁ.) Hetuyā nava, ārammaṇe nava …pe… purejāte āsevane cha …pe… avigate nava. Nakāmāvacaraṁ dhammaṁ paṭicca kāmāvacaro dhammo uppajjati hetupaccayā. Nakāmāvacaraṁ dhammaṁ paṭicca nakāmāvacaro dhammo uppajjati hetupaccayā. Nakāmāvacaraṁ dhammaṁ paṭicca kāmāvacaro ca nakāmāvacaro ca dhammā uppajjanti hetupaccayā … tīṇi. Nanakāmāvacaraṁ dhammaṁ paṭicca nakāmāvacaro dhammo uppajjati hetupaccayā … tīṇi. Nakāmāvacarañca nanakāmāvacarañca dhammaṁ paṭicca kāmāvacaro dhammo uppajjati hetupaccayā … tīṇi. (Saṅkhittaṁ.) Hetuyā nava, ārammaṇe cattāri, adhipatiyā pañca …pe… aññamaññe cha …pe… purejāte āsevane dve …pe… avigate nava. Narūpāvacaraṁ dhammaṁ paṭicca rūpāvacaro dhammo uppajjati hetupaccayā. (Saṅkhittaṁ.)